قصة نجاح ملهمة لتطبيق موبايل اسلامى وصل يوم 28-1-2020 لـ 10 مليون تنزيل و مصنف كافضل تطبيق مجانى على متجر جوجل فكرته ببساطة انه يفكرك بمواعيد الصلاة تم تطويره و تنفيذه بشركةApprocks ابروكس المصرية.
الحكاية بتبدأ سنة 2014 بان مهندس مصرى "م.تميم سعيد" دخل الجيش و مكنش عارف يحدد اتجاه القبلة بشكل دقيق ولا مواعيد الصلاة نتيجة لتنقله بين كذا مكان فاستغل مهاراته فى البرمجة بانه يطور تطبيق يساعده فى تحديد القبلة و مواعيد الصلاة باقل الامكانيات، رغم ان الموبايل ممنوع فى الجيش و ان مكنش معاه غير موبايل واحد و مش معاه اجهزة يجرب اى حاجة بيفكر فيها بس هو بدأ من غير ما يعقد الموضوع، و عمل تطبيق حتى مكانش معموله تصميمات احترافية وقتها بس اللى ميزه انه بسيط جداً و انه بيبعت اشعارات Notificationsاو تنبيهات بمواعيد الصلاة و دية كانت حاجة جديدة فى الوقت دة و بسرعة بعت لحد من صحابة يعمله شوية تصميمات بسيطة باقل الامكانيات، و خلال ايام التطبيق بدأ يخرج من دايرة الاصحاب و المعارف و بعد 6 شهور كان التطبيق عدى الـ 500 الف تنزيل، و بسرعة جدا سيل من الاقتراحات و طلبات لاضافة مميزات جديدة للتطبيق بدأ يوصله و لان المتابعة و الرد على مستخدمين التطبيق كان كبير جداً استعان بزوجتة و اصحابه انهم يساعدوه فى الرد على طلبات و تعليقات الناس، و بدأ ينفذ فعلا بعض الاقتراحات و منها على سبيل المثال ان التطبيق يتضافله (اصوات مؤذنين، القرأن بقراءاته، كروت معايدة، صور مختلفة للمساجد، عرض صور وقت الأذان، تنبيهات الصيام، تنبيه قيام الليل، تنبيهات الأذكار، مدفع الإمساك و المسحراتى، مدفع الإفطار، تحميل القرآن، خلفيات إسلامية، أسماء الله الحسنى، مساجد قريبة، منبة الفجر بمعادلات حسابية .... و مميزات تانية كتير) و كان بينزلها فى النسخ الجديدة للتطبيق و يعلن عنها بشكل شهرى و بعد سنة التطبيق وصل لمليون تنزيل، فريق العمل اللى اتبنى خلال الرحلة دية بقى هو شركة برمجيات مصرية متخصصة فى تطوير التطبيقات و السوفت وير بجودة عالمية.
و يعلق م. تميم مؤسس التطبيق : "هدفنا اننا نخدم مليار و ثمنمائة مليون مسلم، الحمد لله وصولنا لـ 10 مليون تحميل بعتبره نجاح طبعاً بس هو يعتبر تاكيد عملي "Market validation" لاحتياج المجتمع الاسلامى للنوع دة من التطبيقات، و بالشكل دة احنا لسة عندنا شغل كتير لازم نعمله عشان نوصل بالتطبيق لاكبر عدد من المستخدمين، بذلنا مجهود كبير جدا و نزلنا حوالى 73 تحديث للتطبيق من اول ما بدانا و بشكر جداً كل المبرجين و المصممين اللى سهروا و طبقوا و تعبوا و اشتغلوا معانا عشان نوصل لليوم دة و بأكدلهم ان النجاح دة هو مجرد بداية"
اكتر الحاجات المميزة للتطبيق و اللى عجبت مستخدمين كتير هى شكل الجامع و طريقة عرض الاذان و التسجيلات الصوتيه للشيخ محمد رفعت اللى بتعيد الذكريات و انه شامل و بيغنى عن تطبيقات تانية كتيير.
فى رمضان 2019 تم إطلاق ميزة الخاتمة و هى ميزة طلبها كتير من مستخدمي Prayer now الصلاة الأن، عشان تساعدهم فى ختم القرآن فى رمضان و اللى حققت نجاح غير مسبوق بوصول عدد الصفحات المقروئة فى الختمات الرمضانية لـ 487 مليون صفحة و ادت لزيادة الاستخدام و التفاعل بنسبة 270% و زيادة فترات استخدام التطبيق 9 اضعاف متوسط الاستخدام الطبيعى، و فى يوم 28 يناير 2020 وصلت عدد الصفحات المقروئة فى الختمات لـ 21.7 مليار صفحة بفضل الله و من احد اسباب الاقبال على الختمات انها اتطورت باسلوب الالعاب او الـ Gamificationو وجود مسابقات و روح تنافسية فى الختمات و وجود جوائز تشجيعية للفائزين.
و لما سألنا م. تميم عن سبب نجاح التطبيق من وجهة نظره؟ كان رده: لو رجعت بالذاكرة كدة هلاقى ان اهم العوامل اللى ادت للنجاح دة بعد فضل ربنا طبعاً هي:
1. سهولة الأستخدام: من اول يوم التطبيق مش بيحاول يغير طريقة استخدام الناس لطريقة معينة هو كمان بيعتمد على البساطة و ان كل جزئية تكون شارحه نفسها و مش بتحتاج شرح لتعريف المستخدم بطريقة استخدامها.
2. التركيز: ان التطبيق من اول يوم و لحد دلوقتى مركز على هدفه الاساسي و هو التذكير بمواقيت الصلاة و الصفحة الرئيسية ليه بتركز بس على توصيل المعلومة دية و تاكيدها و ان كل المميزات التانية بتظهر من خلال سحب الشاشة يمين او شمال و دة مش بيشتت اليوزر و بيحددله اولوياته و توجهاته.
3. التوقيت: لأن توقيت اطلاق التطبيق سنة 2014 وفرله افضليه لان وقتها مكنش فيه تطبيقات تانية كتير بتوفر نفس المميزات بنفس البساطة و تجربة الاستخدام.
4. الاهتمام بالفيدباك (رأى المستخدمين): لأن التطبيق ملوش اى قيمة لو مفيش مستخدمين مهتمين بيه و مهتمين انه يكون معاهم يومياً كان لازم نسمع لكل اقتراح و كل فكرة او شكوي من المستخدمين و نفلتر و نفرز كل اقتراح و بناء على دراسة الاقتراحات نحدد الاولويات و نبدأ نجدد و نضيف للتطبيق.
5. تحديد الرؤية و التوجهة: لأن هدفنا انPrayer now الصلاة الأن يكون رفيق المسلم الأول كان توجهنا و رؤيتنا واضحين و هى اننا نكون سبب فى تذكير 20 مليون مسلم بصلواتهم يومياً و دة بيخلينا نشتغل حرفياً ليل نهار عشان نوصل ان التطبيق يكون افضل و اسرع و اخف و شكله اجمل.
6. السرعة: الطبيعى فى كل التطبيقات ان فترة التحميل تكون من 15 لـ 20 ثانية، بينما اننا بنضغط فترة التحميل لـ 10 ثوانى او اقل لان الوصول لهدف ان التطبيق يكون رفيق المسلم الأول بيعظم المسؤلية و بيخلينا نقلل كل العوامل اللى ممكن تسبب مشكلة للمستخدمين.
7. الأداء: اختبارات التطبيق بتضمن ان اداؤه على الأجهزة عالى جداً و انه تحت اصعب الظروف مش بيظهر فيه اى خلل.
8. العمل بدون اتصال: مش محتاج تكون فاتح انترنت عشان التطبيق يشتغل معاك بشكل فعال، هو معتمد اكتر على انه يشتغل اوفلاين offline.
9. القيمة: وجود احتياج حقيقى للتطبيق نتيجة للضغوط اليومية وارد جداً انك متلحقش صلاة الظهر او العصر نتيجة لوجودك فى الطريق مثلا او فى الشغل/الدوام و دة بيظهر قيمة التطبيق و الاحتياج لاستعماله بشكل يومي.
10. التصميم: التصميمات ذات الطابع الإسلامى بتميز التطبيق و بتديله طابع خاص و كمان وضوح التصميمات و قوة تعبيرها عامل مؤثر جداً لأن المستخدمين مش بيحتاجوا شرح لكل ايكون عن كيفية استخدامها.
مؤخراً لاحظنا ان 20% من مستخدمينا اللى بيستعملوا التطبيق ظهرت عندهم مشاكل نتيجة ان مش بيوصلهم تحديثات لانهم بيستعملوا موبيلات هواوى و عشان كدة خلال شهر واحد عملنا شراكة مع شركة هواوى و جهزنا نسخة تنزل على متجر هواوى و بعد نزولها بساعات حوالى 74 ساعة كان تم تنزيل 119 الف نسخة من التطبيق "الحمد لله" و دة كان بالتزامن مع إحتفال شركة أبروكسApprock بوصول تطبيق الصلاة الأن Prayer Now يوم 28 يناير 2020 لـ 10 مليون 1تنزيل.
و أخيراً نوجه خالص الشكر و العرفان لكل المطورين/المبرمجين/المصممين/القائمين على التطبيق بشركة ابروكس Approcks المتميزة و اللى قدرت فى فترة مش كبيرة تحقق النجاح البراق دة و تظهر للعالم ان فى مصر يوجد صناعات تقنية قادرة على المنافسة بأيادى شباب مصري قادر على الابتكار و التحليل و الابداع، و بندعوكم لتحميل prayer now الصلاة الان لاستخدامه ولمشاركتنا فى الأحتفال بالوصول لعشرة مليون تحميل و بأذن الله قريب جداً نحتفل بالـ 20 مليون تحميل.
Comments