لو انت فوتوغرافر ليه تعمل ويب سايت ؟

لو أنت فوتوجرافر ... تعالى أقولك أنت ليه محتاج تعمل ويب سايت خاص بشغلك ودة هيفيدك إزاي !

فكرة تصميم ويب سايت لفوتوغرافر ممكن يعتبرها ناس كتير إنها فكرة ملهاش أهمية وصعبة ومحتاجة جهد كبير في التنفيذ، بس قبل ما نبدأ و نقول و نفكر في كيفية التصميم ....السؤال الأهم هنا هو إيه الاختلاف في إن يكون عندك حساب على موقع زي Tumblr, Flickr, px500 أو مدونة.

وليه المصور محتاج ويب سايت وهيفيده إزاى ؟

الويب سايت هيضيفلك مزايا لشغلك و تسهيلات كتير ممكن مكنتش تعرفها زي :

1- الإحترافية :

لما تمتلك ويب سايت دة هيعود عليك بأثر مهم من حيث الشكل الاحترافي، لإن ببساطة العملاء لما تدخل على البيدج الخاصة بشغلك أو أي اكونت خاص بك ويبقا في ويب سايت لشغلك دة، الثقة فيك من ناحية العميل هتزيد بشكل قوي جدا، وبالتالي هيأثر على زيادة فضول العميل لمتابعة شغلك والبحث عنه وبالتالي مبيعاتك وانتشار اسمك وشغلك ينتشر بشكل أسرع.

2- نشرة اخبار الايميلات:

تقدر تسوق لنفسك ولشغلك ومقالاتك عن طريق الايميلات: كل شخص لو مهتم بشغلك أو عايز يتابعك فكده ده عميل محتمل جدا لدرجة إنه سايب ايميله الشخصي، فتبدأ بعد كده إنك تبعت لكل شخص سايب الايميل بتاعه أخبار بسيطة عنك وليكن شغل جديد عملته، البوم جديد، مكان جديد، وهكذا.

وكل ما يكون الكلام ده بشكل دوري ومستمر كل ما اكتسبت عملاء أكتر واهتمام العملاء يزيد بشكل أكبر.

والاحصائيات بتأكد إن عدد مستخدمي الايميل في العالم في سنة 2019 وصل لـ 3.9 مليار مستخدم ومن المتوقع إن الرقم ده يوصل لـ 4.3 مليار مستخدم في سنة 2020 وده تقريبا عدد نص سكان العالم ودي تعتبر فرصة تسويقية كبيرة جدا لازم استغلالها.

وفي سنة 2019 بس تم إرسال حوالي 293.6 مليار ايميل ودة رقم ضخم جدا ومن المتوقع في سنة 2020 يوصل لـ 347.3 مليار.

المصدر: https://www.oberlo.com/blog/email-marketing-statistics

3- إمكانية الشراء:

ممكن من خلال الويب سايت تعرض وتبيع كتب عن التصوير أو كورسات تصوير ويكون في إمكانية الحجز والدفع المسبق عن طريق الـكريديت كارد ، كل دة بيساهم في زيادة المبيعات والانتشار والثقة لشغلك.

4- عائد مادي من الإعلانات:

ممكن كمان تحصل على عائد مادي من الإعلانات، عن طريق بيع مساحة إعلانية أو إعلانات جوجل أو الترويح لمنتجات لشركات أخرى، وتقدر تاخد عمولة من خلال عرض إعلانات الشركة الأخرى.

بس دة هيتطلب جهد كبير جدا وإن الويب سايت يكون عليه ترافيك عالي جدا يعني معدل الزيارات عليه كبيرة جدا وده هيترتب عليه إن المعلنين يطلبوا يعملوا إعلان عندك و دة محتاج إن الويب سايت ينتشر بشكل كبير و في مجالك على الأقل بشكل أكبر. ودة سبب كبير يحفزك تعمل ويب سايت وتكبره.

5- بيع استوكات: ممكن تعرض صورك زي استوك كبير حد يستخدمه في موقعه زي مواقع مشهورة كبيرة زي (Shutterstock ) وغيره من المواقع اللي بتعتمد على عرض الصور أو الفيديوهات بكذا صيغة ويقدر المستخدم يختار أي صورة ويدفع مقابل قيمتها، ودي أمثلة على مصور مخصوص بيستخدم النقطة دي زي الموقع دة

https://www.gavingough.com/

6- كورسات : ممكن تستغل الويب سايت في عرض كورس تصوير أو ورشة عمل معينة، لأن كورس التصوير أو ورشة العمل لها شعبية كبيرة جدا وبتطلب كتير ولما تعلن عن كورس زي كده ويكون عندك ويب سايت وفي إمكانية الدفع من خلاله كل ده هيزود من انتشار الويب سايت بتاعك واسمك وشغلك بشكل أكبر.

7- مدونة: أنت ممكن تعيد هيكلة الكورسات بتاعتك أو ورش العمل أو أي نصائح عملية عن التصوير، زي أفضل أماكن تصوير في مصر، أفضل وقت تصوير، أدوات التصوير، كل النصائح دي تعيد تشكيلها في شكل مقال مصغر الكلام دة يتشرح فيه بشكل سهل وبسيط بحيث تقدر تجذب بيه العملاء بشكل كويس والعميل يبدأ يكون عنده إحساس الاهتمام أو إنك بتقدمله نصائح بشكل مباشر ومن غير أي تكلفة نهائيا.

طبعا أنت دلوقتي حسيت بفوائد الويب سايت وأدركت الميزات اللي هيقدمهالك، فلو محتاج تعرف تفاصيل أكتر تابعنا الفترة الجاية أو ابعتلنا على رسايل الصفحة.